ප්‍රංශයේ මුල් පුටුව දක්වා ගිය අසම්මත ගුරු ගෝල ප්‍රේමය

Mar 10, 2020

ප්රංශයේ ජනාධිපති Emmanuel Macron සහ ඔහුගේ බිරිඳ Brigitte Macron අතර විවාහය ලෝකය පුරාම උණුසුම් කතාබහට ලක් වුනා. මනුෂ්ය නිදහසට උපරිමයෙන් ගරු කරන රටක් වන ප්රංශය ජනාධිපති සටනේදී ඔහුගේ උගත්කම , පරිනතබව මිස ඔහුගේ විවාහයේ පුවත චන්දය දීමට සුදුසුකමක් ලෙස භාවිතා කළේ නැහැ. ඔහුගේ ප්රේම කතාව වෙනස් අයුරින් දුටු ප්රවීණ සමාජ මාධ්ය ලේඛිකා අනිෂා ජයකොඩි මහත්මියගේ සටහනක් අප පහතින් පල කරමු.

Continue Reading Below

නාට්‍ය ගුරුවරියට ප්‍රේම කළ පුංචි කොලුවා

අවුරුදු 15 වයසැති එමානුවෙල් ප්‍රංශයේ අමියෙන්ස් හි පාසලක ඉගෙන ගන්නා කොලු ගැටයෙකි. 39 හැවිරිදි බ්‍රිජට් මාරි ක්ලෝඩ් මැක්රෝන් ඒ පාසලේ නාට්ය ගුරුවරියයි. එමානුවෙල් ඇගෙන් ඉගන ගත්ත නාට්ය කලාවක් නැහැ .ඔහු කලේ ඔහේ ඇස් වලින් ඇය දිහා බලාන හිතෙන් බොහො දුර යාම විතරයි. මොහුගේ අනිසි බැල්ම විෂයට පරිබාහිර බව සහ බොහෝ බර බව මාරිටත් දැනුණා, නමුත් මේ තමන්ගේ ලොකු පුතාටත් වඩා අවුරුදු දෙකක් බාල මේ හිච්චි teenage කොලුවා ගේ හෝමෝන විකාශන අවස්තාවක් යයි සිතා හිනැහී ඇය ඉවත බලාගත්තා.

දරුවන් තුන් දෙනෙකුගේ අම්මෙක් වුනු ඇයට එමානුවෙල් තවත් දරුවෙක් පමණයි කියා හිතෙන්න ඇති.

ඒත් වයසෙන් කුඩා මේ කොලුවාගේ හදවත නම් මහ විශාල එකක් උනා. තමන්ගේ දරුවක් සේ ආදරෙන් තම හිස අත ගෑ මාරි ක්ලෝඩ් මැක්රෝන් හෙවත් තම ගුරුවරියගේ හිස ආදරෙන් සිඹින්න සහ ඇය තම පෙම්වතිය බවට පත් කරගන්න තවත් අවරුදු දෙකක් ඇතුලත් ඔහු සමත් වෙනවා. ඒක වෙච්ච විදිහ දන්නේ ඒ හදවත්ම පමණයි.

ඔන්න මේ හරියේදී ලංකා වාසී අපිට නම් ටොන් ගානක ප්‍රශ්න මතුවෙනවා.

“අප්පෝ මුන් මොන ගුරුවරුද? ඔව්වා හෙණගහන අපරාධ”

“ඒ නාකි ටීචර් පොඩි එකාව රවට්ට ගන්න ඇති”

“කොල්ලව එයාගේ ලිංගික ඕන එපාකම් වලට හුරු කරගන්න ඇති”

“මොකද ඔය පොඩි කොල්ලා ඒ ගෑණිව කසාද බඳියි කියල යෑ….. බ්ලා බ්ලා බ්ලා…..”

හැබැයි අපි එහෙම කිව්වට කතාවෙ අවසානය අපි හිතුවට වඩා ගොඩක් වෙනස් වෙනවා. වෙන්න ඕන විදිහටම හැමෝම මේ ආදරේට විරුද්ධ උනා. සමහරු හිනා උනා. එමානුවෙල් ගේ දෙමව්පියෝ මේ සම්බන්දෙ නවත්තන්න එයාලට කරන්න පුළුවන් ලොකුම දේ කළා, ඒ එමනුවෙල්ව වෙන පාසලකට මාරු කරපු එක, දෙමාපියන්ගේ පැත්තේ හිටගෙන බැලුවම ඔවුන් කලේ කල යුතු නිවැරදිම දේ උනත්, ඉස්කෝලේ වෙනස් කරපු පමණින් හදවත් වෙනස් වෙන්නේ නැති බව ඔවුන් දැන හිටියේ නැහැ.

එමානුවෙල් ඉස්කෝලෙන් යන්න කලින් මාරිට පොරොන්දුවක් වෙනවා “මම කවදහරි බඳින්නේ ඔයාව තමයි, ඔව් මම ඒක කරනවාමයි. කොහොමත් වයසත් එක්ක මිනිස්සු හිතන පතන දේවල් වල හැඩය වෙනස් වෙනවා. මුහුකුරා යනකොට බලාපොරොත්තු වල ස්වරුපය වෙනස් වෙනවා. තිස් ගණන් වෙනකොට විසි ගණන් වලදී හිතිච්ච දේවල් මතක් වෙද්දීත් සමහරවිට හිනා යනවා,අනික සමහර වෙලාවට ආදරේදී පොරොන්දු කියන්නේ ඇස් දිහා බලන් ඉන්නකොට ඔහේ කියවෙච්ච දේවල් විතරයි, එව්වා ඉෂ්ට කරන්න බෑ කියල හොඳටම දැන දැන උනත් පපුවේ බල කිරිල්ලට ඔහේ කියල දානවා.

විවාහයකින් අවසන් වන අසම්මතය

තමාට වඩා දශක දෙක හමාරකින් බාල තම ගැටවර පෙම්වතාගේ මේ පොරොන්දුව ගැනත් ඇයට එහෙම හිතෙන්න ඇති. නමුත් වෙන්නෙ ඒක නෙමයි. පොරොන්දු වෙච්ච විදිහටම ඔහු ඇයව විවාහ කරගන්නවා. ඔහුට වයස අවුරුදු 30දී ඇයට වයස අවුරුදු 54 දී දෙමව්පියන්ගේ කැමැත්තත් අරන් ප්‍රංශයේ තවත් සොඳුරුතම ප්‍රේම වුර්තාන්තයක් අනාගතයට දායාද කරමින් එමානුවෙල් මැක්රෝන් බ්රිජට් මාරි ක්ලෝඩ් මැක්රෝන් හා විවාහ වෙනවා.

අත්දැකිම් බහුල ඇයගේ බහුශ්රුත ප්‍රේමය ඔහුව බොහෝ දුර ගෙනියනවා .ඔහු තමයි වර්තමාන ප්‍රංශයේ ජනාධිපති. දැන් ඔහුට අවුරුදු 42 යි ඇයට 66යි… ඒත් අදටත් ඔවුන් ආදරෙන් ඉන්නවා. බිරිඳ ගැන ඇහුවම ඔහු කියන්නේ………..

” මේ සියල්ලම ඇය වෙනුවෙන්, ඇය තමා මගේ සියල්ලම, ඇය නැත්තම් මම මෙතන නැහැ…”

පොඩි කතාවක කොටස් දෙකක් රඟපාපු ගමන්, රස්සාවක ප්‍රමෝෂන් එකක් හම්බෙලා අතට කීයක් හරි වැඩිපුර හම්බෙච්ච ගමන් හරි නැත්තන් ළමයෙක් දෙන්නෙක් හම්බෙලා ටිකක් බඩ කඳ ආරපු ගමන් තමන් එක්ක මුල ඉඳන් කට්ට කාපු ගෙදර ගෑනිව අමතක කරලා, ඒ ගෑනිට ලෝකෙ නැති චෝදනා කරලා අත ඇරල දාන පිරිමින්ට එමානුවෙල් උඩ පැනලා කණට ගැහුවා.

තමන්ට වැඩිය වයසින් වැඩි හරි අඩු හරි මොකක් හරි කමක් නැහැ, විවාහයට තෝරාගන්න ඕනේ තමන්ව සතුටෙන් තියන්න පුළුවන් කෙනා, සහ තමන්ට සතුටෙන් ඉන්න පුළුවන් කෙනා,

ඒ නැතුව ලෝකෙට ලස්සනට පෙන්නන්න පුළුවන් කෙනා නෙමෙයි. ලස්සන තියෙන්නේ වෙන කොහෙවත් නෙමෙයි තමන්ගෙම ඇස්වල ඒ වගේම ලෝකේ කව්රු හරි කලාම ඒ ගැන අගය කලාට, අල්ලපු ගෙදර සුමනසිරි ගේ කොල්ලා අඟලක් උස කෙල්ලෙක් බැන්දම ගම පුරා ගතු කියවන්නේ නැතුව, දික්කසාද වෙච්ච නිලියක් ආයේ බැන්දම එයාලට චරිත සහතික දෙන්න යන්නෙ නැතුව, දුවගෙ පෙම්වතා ගෙදරට එන්නත් කලින් හඳහන් කොපිය ඉල්ලන්නේ නැතුව අපිත් එමානුවෙල් වගේම ආදරනීය මිනිස්සු බව ප්‍රයෝගිකවම පෙන්නන්න අපිට පුළුවන්.

ජීවිතේ කියන්නේ අමුතුම රහක් ..ඒක එක එක්කෙනාට දැනෙන්නේ එක එක විදිහට, තමන්ට දැනිච්ච විදිහට තමන් විඳින විදිහටම අනිත් අය ඒක විඳින්න ඕනේ කියල එකක් නෑ. අනුන්ගේ කථා වලට එළියෙන් ඇඟිලි ගහල ඒවෑ රහ කියන්න අපි කාටවත් බෑ .මොකද එමානුවෙල්ගෙ කුළේ මිනිස්සු ලෝකෙට ඕන විදිහට ජීවත් වෙන්නේ නැහැ. ඒ ගොල්ලෝ ඒගොල්ලන්ගේ ක්‍රමේට ජීවිතේ විඳිනවා. වෙන්න ඕනේ ඒකයි, තමන්ට දැනෙන විදිහට ජීවිතේ විඳින එකයි.

අනිශා ජයකොඩි ✍️

Tags

LS 4

Share Now

Related Article