සුවඳ විලවුන් භාවිතයේදී මේ ගැනත් සිතන්න

Apr 9, 2018

අද කාලයේ සුවඳ විලවුන් භාවිතා නොකරන කෙනෙක් නැති තරම්. ගතේ නැගෙන දහදිය ගඳ මග හරවා ගැනීමට සුවඳ විලවුන් උපකාර කරනවා. නිතර නිතර සමාජය සමඟ ගැටෙන, දවසේ වැඩි වේලාවක් එකම ඇඳුම ඇඳගෙන රැකියා වල නිරත වන අයට මෙය හොඳ විසඳුමක්. සුවඳ විලවුන් ගැල්වීම නිසා තමාගේත්, අන් අයගේත් සිත ප්‍රබෝධමත් වෙනවා. දවසේ වැඩ කටයුතු ප්‍රබෝධයෙන් කර ගැනීමටත්, සමාජයේ ආකර්ෂණය ලබා ගැනීමටත් සුවඳ විලවුන් රුකුලක් වෙනවා. ඉතින් අද අපි තීරණය කළා goodhousekeeping.lk වෙබ් අඩවිය හරහා ඔබට මේ ගැන ලිපියක් ඉදිරිපත් කරන්න.

කලින් කිව්වා වගේම, සුවඳ විලවුන් ගැල්වීම ප්‍රියජනක ක්‍රියාවක්. නමුත් නිසි අවබෝධය නැතිව සුවඳ විලවුන් ගල්වන්න ගියොත්, අන් අයගේ අප්‍රසාදයට ලක් වීමටත්, තමාට ගැටළු ඇති වීමටත් ඉඩ තිබෙනවා.

Continue Reading Below

  • එක් එක් අයගේ දහදිය දමන ස්වභාවය අනුව සුවඳ විලවුන් වල ක්‍රියාකාරිත්වය වෙනස් වෙන්න පුළුවන්. මේ නිසා ඔබට ගැලපෙන සුවඳ විලවුන් වර්ගයක් තෝරා ගැනීමට උනන්දු වන්න. සුවඳ විලවුන් වර්ග කිරිපයක් වරින් වර භාවිතා කිරීමෙන්, ඔබට ගැලපෙන සහ ඔබට ප්‍රිය සුවඳ විලවුන් වර්ගය තෝරා ගන්න පුළුවන්.
  • සුවඳ විලවුන් නිපදවීමේදී රසායනික ද්‍රව්‍ය භාවිතා කරන නිසා, ඒවා ගැල්වීම ප්‍රවේශමෙන් කළ යුතුය. සුවඳ විලවුන් ගැල්වීම හදිසියේ කරන්න බැහැ. සුවඳ විලවුන් ස්ප්‍රේ කරන විට ඇස් වලට සහ කටට නොයන සේ පරිස්සම් විය යුතුය. ඇතැම් සුවඳ විලවුන් වර්ග ඇස් වලට යෑමෙන් අන්ධභාවයට පවා පත් විය හැක.
  • බොහෝ දෙනෙක් ඇඳුම් ඇඳීමෙන් පසුව, සුවඳ විලවුන් ඇඳුම් වල තවරා ගන්නට පුරුදු වී සිටිනවා. නමුත් එම ක්‍රමය වැරදි වන අතර, ඇඳුම් වල තැවරූ සුවඳ විලවුන් වැඩි වෙලාවක් පවතින්නේ නැහැ. ඒ වගේම සුවඳ විලවුන් ගැල්වූ ඇඳුම් වල පැල්ලම් මතු වෙන්නත් ඉඩ තියෙනවා. සුවඳ විලවුන් ලෝහයෙන් තැනු ඔබේ ආභරණ මත තවරුනොත් ඒවායේ දිස්නය නැති වී යනවා.
  • තවත් සමහරු දහදිය ඇති විට සුවඳ විලවුන් ගැල්වීමට පුරුදු වී සිටිනවා. නමුත් එයින් සිදු වන්නේ අප්‍රසන්න ගඳක් මතු වීමයි. එමෙන්ම පෙර දිනක ඇඳපු ඇඳුම් වලට සුවඳ විලවුන් ගැල්වූ විට දහදිය ගඳ යටපත් වේ යැයි සමහරුන් අපේක්ෂා කරනවා. නමුත්, එහි ප්‍රතිඵලය වන්නේත් ඔබ වෙතින් අප්‍රසන්න දුගඳක් අන් අයට දැනීමයි.
  • සුවඳ විලවුන් ගැල්විය යුත්තේ පිරිසිඳු කර ගත් ශරිරයේයි. සෝදා පිරිසිඳු කර ගත සිරුරේ කණ දෙපස, කිහිලි වල, පපුවේ මැද සහ මැණික් කටුව වැනි ස්ථාන වල සුවඳ විලවුන් ගැල්වූ විට ඒ සුවඳ වැඩි වෙලාවක් පවතිනවා.
  • එමෙන්ම සුවඳ විලවුන් පෙඟවූ පුළුන් කැබැල්ලක් සිරුරේ ඕනෑම තැනක රඳවා ගැනීමෙන්, ඔබට සුවඳ වැඩි වෙලාවක් රඳවා ගන්න පුළුවන්.
  • සුවඳ විලවුන් ගැල්වීමෙන් සමාජයේ ආකර්ෂණය දිනා ගත හැකියි. නමුත් සමහරුන් ඕනෑවට වඩා සුවඳ විලවුන් ගැල්විමටත්, එකවර සුවඳ විලවුන් කිහිපයක් ගැල්වීමටත් හුරු වී සිටිනවා. නමුත් එයින් ඔබ අන් අයගේ අප්‍රසාදයට ලක් වෙන්න පුළුවන්.
  • තමා අකමැති සුවඳක් යම් අයෙකුගෙන් නිතර දැනෙනවා නම්, එය ඔහුට කරදරයක් වෙන්න පුළුවන්. එම නිසා එක් සුවඳ විලවුන් වර්ගයක්, මඳ වශයෙන් ගැල්වීම සුදුසු වෙනවා. පොදු ප්‍රවාහන සේවයක ගමන් කරන විටදී මේ ගැන වඩාත් සැලකිලිමත් විය යුතුයි.
  • ඇතැම් සුවඳ විලවුන් වර්ග ගැල්වූ විගස සුවඳ විහිදුවන්නේ නැහැ. එයට හේතුව වන්නේ, එය සකසා ඇත්තේ දහදිය දැමූ විට සුවඳ දැනීමට විය හැකියි.
  • සායනික ද්‍රව්‍ය අධික සුවඳ විලවුන් වර්ගයක් නිතර භාවිතා කිරීම නිසා, සමේ ආසාදන ඇති වෙන්නත් පුළුවන්.
  • සුවඳ විලවුන් මිලදී ගැනීමට පෙර බෝතලයෙන් සුවඳ ඉඹ බලා තෝරා ගැනීම වැරදියි. එයට හේතුව වන්නේ ඒවායේ නියම සුවඳ මතු වන්නේ සමේ ගැල්වූ පසු වීමයි.

Tags

HK 7

Share Now

Related Article